Gearáin faoin Acht um Míchumas (teip ar alt 25, 26, 27, 28, 29 den Acht seo a chomhlíonadh)

Féadtar gearán a dhéanamh i gcoinne an Bhoird um Fhaisnéis do Shaoránaigh (an BFS) mura gcomhlíonann siad forálacha Ailt 25, 26, 27 agus 28 den Acht um Míchumas, 2005. Baineann na hailt seo den Acht le rochtain ag daoine atá faoi mhíchumas ar an méid a leanas:

• Foirgnimh phoiblí an BFS;
• Scéimeanna agus seirbhísí an BFS;
• seirbhísí a sholáthraítear don BFS; nó
• faisnéis.

I gcomhréir le hAlt 39 (2) den Acht um Míchumas, 2005 (féach nóta 1 thíos), seo a leanas na nósanna imeachta chun na gearáin siúd a dhéanamh agus a fhiosrú.

Gearán a dhéanamh

• Féadfaidh duine gearán a dhéanamh nó féadfaidh na daoine a leanas gearán a dhéanamh thar a c(h)eann:
  • céile/páirtnéir, tuismitheoir nó gaol;
  • caomhnóir nó duine a ghníomhaíonn in loco parentis leis an duine sin;
  • ionadaí dlíthiúil;
  • abhcóide pearsanta,
  nó duine a dhéanann abhcóideacht thar ceann an duine sin lena t(h)oiliú.
• Ní mór gearán a dhéanamh i scríbhinn, a bhféadfadh facs nó ríomhphost a bheith i gceist leis, agus ba cheart na sonraí teagmhála go léir a sholáthar don duine a bhfuil an gearán á dhéanamh acu.
• Ba cheart go luafar sa ghearán gur gearán é faoi Alt 38 den Acht um Míchumas, 2005 agus ba cheart go leagfar amach, a mhéid is indéanta, na bunúis atá leis an ngearán a bhaineann le teip an BFS chun rochtain a sholáthar ar a scéimeanna agus seirbhísí.
• Ní mór an gearán a dhéanamh le:
  An Príomhfheidhmeannach,
  An Bord um Fhaisnéis do Shaoránaigh,
  Teach Ché Sheoirse,
  43 Sráid Chnoc na Lobhar,
  Baile Átha Cliath 2.
  Seo a leanas na sonraí ábhartha facs agus ríomhphoist:
  Facs: (01) 605 9099
  Ríomhphost: ceo.office@ciboard.ie
  Tar éis gearán a fháil, cuirfidh an Príomhfheidhmeannach an cheist faoi bhráid an Oifigigh Fiosrúchán (féach nóta 2 thíos) agus cuirfidh siad é sin in iúl don duine a bhfuil an gearán á dhéanamh acu, dá réir.

Gearán a fhiosrú

• Tar éis an gearán a fháil, a sheol an Príomhfheidhmeannach ar aghaidh, cuirfidh an tOifigeach Fiosrúchán in iúl don duine a rinne an gearán go bhfuarthas é.
• Sa chás go measann an tOifigeach Fiosrúchán go bhfuil an gearán amhrasach nó míréasúnta, cuirfidh sé nó sí an Príomhfheidhmeannach agus an duine a rinne an gearán ar an eolas air seo. Murach sin, déanfaidh sé nó sí an gearán a fhiosrú.
• Féadfaidh an tOifigeach Fiosrúchán faisnéis/sonraí breise a iarraidh ón duine a rinne an gearán agus féadfaidh siad a cheangal go soláthraítear an fhaisnéis/na sonraí sin laistigh de thréimhse shonraithe.
• Féadfaidh an tOifigeach Fiosrúchán dul i gcomhairle le gach páirtí a mheasann sé nó sí atá cuí i dtaca leis an gceist.
• I gcaitheamh an fhiosrúcháin, féadfaidh an tOifigeach Fiosrúchán tabhairt faoi agallaimh leis na daoine siúd a mheasann sé nó sí atá cuí, an duine a rinne an gearán ina measc, chun faisnéis a bhailiú.
• Coimeádfaidh an tOifigeach Fiosrúchán taifead scríofa dá f(h)iosrúchán.
• Ullmhóidh an tOifigeach Fiosrúchán tuarascáil scríofa ar thorthaí an fhiosrúcháin ina leagtar amach a t(h)orthaí anuas ar chinntiúchán maidir leis an méid a leanas:
  • cé acu ar theip nó nár theip ar an BFS chun an fhoráil ábhartha den Acht um Míchumas a chomhlíonadh, agus
  • má thugann an cinntiúchán sin an teip sin le fios, na bearta ar gá don BFS a ghlacadh chun an fhoráil/na forálacha ábhartha den Acht a chomhlíonadh.
• Cuirfidh an tOifigeach Fiosrúchán cóip dá t(h)uarascáil faoi bhráid an duine a rinne an gearán agus faoi bhráid an Phríomhfheidhmeannaigh.
• Cuirtear deireadh le fiosrú an ghearáin nuair a chuirtear an tuarascáil faoi bhráid an duine a rinne an gearán agus faoi bhráid an Phríomhfheidhmeannaigh.

Nóta 1:
Foráiltear in Alt 39 (2) go gcuirfidh ceann comhlachta phoiblí nósanna imeachta i dtoll a chéile i dtaca le gearáin a dhéanamh agus a fhiosrú agus na ceisteanna eile siúd a bhaineann le gearáin a mheasann sé nó sí is cuí agus cuirfidh sé nó sí faoi deara go bhfoilseofar na nósanna imeachta.

Nóta 2:
Cheap an Príomhfheidhmeannach, mar cheann an Bhoird um Fhaisnéis do Shaoránaigh, i gcomhréir le forálacha Alt 39 (1) den Acht um Míchumas, 2005, Oifigeach Fiosrúchán chun gearáin a fhiosrú a dhéantar faoi Alt 38 den Acht um Míchumas. Beidh Oifigeach Fiosrúchán neamhspleách i bhfeidhmiú a fheidhmeanna nó a feidhmeanna. Tabharfaidh Oifigeach Fiosrúchán faoi fhiosrúchán go príobháideach.